داش‌لار- تاريخيميز
یازار : آيدين(علي محمد) خلفي زنگير
علي داشي-علي چاپان
تولون ... كندينده، اوجا قايالارين اؤنونده علي داشي آدلي بير يئر وار. اوردا اوستو سيمان‌لانميش بير داش وار و باشينا يازيليب : امام علي حضرت‌لرينين آنما يئري (محل توسل امام علي).
اورا قوتسال ساييلير. اوزاقدان-ياخيندان اورا نذيرلر ائديلير و گتيريب اوردا پايلانير. اوردا اولان داشين اوستو يازيلي ايميش. گؤروندويونه گؤره او داش يئر ييه‌سي‌نين يئري‌نين ياخشي اكيلمه‌سينه انگل تؤره‌ديرميش. اونا گؤره يئر ييه‌سي اونو يئريندن اويناديب دره يه هئلله‌دير. گئجه ياتير يوخودا گؤرور بير نئچه آدام اونون جانينا داراشيب‌لار دئييرلر؛ او داشي نييه هئللتدين؟ نئجه هئلله‌ديب‌سن گئد اوجور قايتار يئرينه. او كيشي ساباح تيكه‌لن‌ميش داش‌لاري يئرينه قايتارير و آيريدان داغيلماسين دئيه اوستونو سيمان‌لاييرلار.
ايندي علي داشيندان يوخاري قايادا علي‌چاپان آدلي بير يئر وار. اورا بو آدي وئرن‌لر اينانيرلار؛ امام‌علي حضرت‌لري اؤز قيلينجي ايله او قاياني چاپيب (ياريب) و اونون بير پارچاسي آشاغا هئلله‌نيب كي، ايندي علي داشي آدلانير.
دئييلديگينه گؤره علي‌چاپان آدلي قايانين اوزه‌رينده اولان چئشيدلي شكيل‌لر، ايندي بير زادا اوخشاماسا دا، جانلي تاريخيميز كيمي انساني دوشنمه‌يه وادار ائدير.
دئمه‌لييم بو كندده «اووشون بره» آدلي بير يئرين ياخينليغيندا اوستونده يازي قازينتيسي اولان داش قوچ وار ايميش، نه‌يازيق كي، اون‌بئش-ايگيرمي ايل اؤنجه اوغورلانيب. بونلار بيزيم اينديليگيميزي كئچميشيميزه باغلايان زنجيرين پاخلالاري‌ديرلار. بو پاخلالاري ايندي ساخلاماق‌دا عيرت گؤسترمه‌سك گله‌جك‌ده اونلارين بوش يئري بيزه آغير باشا گله بيلر.