اويون
یازار : آيدين(علي محمد) خلفي زنگير
هر اويونچو اوچ-بئش سايدا ايكي اوووج دولوسو قدر قوم كوماسي حاضيرلايير. اويونچولار آرخا-آرخايا اوتورا‌راق، اويناديقلاري شئيي اؤز كوما‌لاريندان بيرينده گيزله‌ديرلر. يا دا هر اويونچو او بيريسي‌نين باخماماسيندان آرخايين اولسون دئيه، بيري اوزونو اويانا دؤندرير، بو اويونون اصطلاحي ايله دئسك «كوسور». باسديراندان سونرا «گَل» دئيير.
اويونچونون بيري، او بيريسي‌نين گيزلتديگيني تاپماغا گئدير. كومانين بيريني دئيير: «بو منيم»، بيري‌سيني دئيير: «بو سنين» و داغيدير.
بو منيم دئينده گيزلديلن شئي تاپيلسا اودور. بو سنين دئينده تاپيلسا، كوما ييه‌سي‌نين اولور. سونرا كوماني گزن اويونچونون كوماسي‌نين اوستونه قاييديرلار و كومانين اوستونه گلن اونو دئييلديگي شكلده گزير. اويون بئله دوام ائدير.
من خاتيرلاديغيما گؤره بو اويونو گنجلر بايرامدا يومورتا گيزلتمكله، قيز-گلينلر تئل‌ميلي و ياخا سانجاغي، اوشاقلار ايسه بالاجا داش و دويمه گيزلتمكله اويناييرديلار.
اويون
یازار : آيدين(علي محمد) خلفي زنگير
اويون اويناماق اوشاقلار اوچون نه‌دن اؤنملي‌دير!
بئيينده‌كي سيخ استفاده اولونان يوللار
كيچيك بير اوشاق نه قدر چوخ تجربه قازانيرسا بئينينده او قدر چوخ و آيدين ايزلر يارانير. اوزون وعده‌ده ديليميز، عادتلريميز، باجاريقلاريميز، ذؤوقلريميز، دوشونجه‌لريميز و بيلگي‌لريميزله بيرليكده بو اؤيرنمه ايزلري بيزي اولدوغوموز شخصه دؤندرير: گونش پارلاديغيندا هاوا قيزير، بال دادلي‌دير و گيجيركان اوتلاري اينجيدير. بير اوشاق بوتون بونلاري اؤيرنمك مجبوريتينده‌دير و هر كيچيك اوشاغين غير فعال اولاراق ياشاماقلا يوخ عيني زاماندا فعال اولاراق آراديغي دونيايلا مشغول اولاركن بونلاري اؤيرنير.
اوشاقلارين، اؤز تجربه‌لريني ياشاما، اشيالاري پارچالاييپ تكرار بيرلشديرمه و آزما فرصتينه احتياجلاري وار. بونو دا ياشيدلارييلا (تاي-توشلارييلا) اويناياراق، عايله‌ده و بعضاً ده گئري چكيليب ياخينلاشاراق تك باشينا گرچكلشديريرلر.
اوشاقلار اويون اويناركن قانونلارا اويماغي و عيني زاماندا آيري اويونچولارلا بيرليكده قانونلاري دييشديرمه‌يي اؤيرنيرلر. ياخينلاشماغي و بوتون گوجلري ايله بير هدفه دوغرو چاليشماغي امتحان ائديرلر. بيريني چؤله چيخارمادان قازانماغي دا، اودوزماغي دا، موتلو اولماغي و سالديرقانلاشما‌دان اؤفكه (غضب) ويا باشارييلا باشا چيخماغي اؤيرنيرلر. يولداشلارييلا و عايله‌ده اويون اويناركن اؤزلريني سوسيال بير توپلومون پارچاسي اولاراق ياشارلار، اويون و سوسيال قانونلارا گؤره داورانماغي اؤيرنيرلر. مسؤوليت و اتحاد، سايقي و عدالت دويغوسو گليشديريرلر. بونون يانيندا دا اوشاقلار حس‌لريني گليشديريب، ماهيچه‌‌لريني، حركتلريني و باجاريقلاريني آليشديريرلار.
اويون اويناركن بوتون بونلاري و داها آرتيغيني اؤيرنيرلر: قورخما‌دان، منفي بير فضادا، سئوگي و گوون دولو بير محيط‌ده -باشقا بير دئييشله، اويون اويناياراق. اوشاقلار بو سيرادا اويناماقلا اؤيرنمه‌ك آراسيندا فرق قويمازلار، اويناركن اؤيرنيرلر.
سئوگيلي والدينلر، اوشاقلارينيزلا اوينايين!
اوشاقلار مدل‌لردن اؤيرنيرلر. بو دوروم اويون اوچون ده گئچرليدير. داها مين ايلي آشان بير مدت اؤنجه راهب و فيلسوف آوگوستينوس «والدينلرين حياتي، اوشاقلارين اوخودوغو بير كتابدير» دئميشدير. بير اوشاق آنا و بابا ايله بيرليكده اوينامانين نه قدر گوزل اولدوغونو ياشارسا بو قانونو اؤزونه ساخلار: «اويناماق ذؤوقلودور. اؤزومو گوونلي و راحت حس ائديرم.» والدينلرين ده اويونون قانونلارينا نئجه اويدوقلاريني، اؤفكه (غضب) و باشارييلا نئجه ياناشديقلاريني، قازانماق اوچون نه‌لر ائتديكلريني، آما اوشاقلارييلا چتين بير گؤرَوده (بير پازل قورماق كيمي) بيرليكده نئجه چاليشديقلاريني ياشاديغيندا اوشاق، آنلاملي و ايلنجه‌لي زمينه‌ده اورتاق بير داورانيشي دا ياشار. بيرليكده اويناركن اوشاقلارلا والدينلر عيني اشيا‌لارلا ايلگي‌لنير، بيرليكده دانيشيب گولر و بيرليكده اؤزلريني راحت حس ائدرلر. والدينلر بيرليكده اويناركن اوشاقلاري‌نين گوجلو جهتلريني و باجاريقلاريني كشف ائده‌بيلرلر. شخصيتيني فرقلي دوروم‌لاردا ياشاييب اوشاغين گليشيمينده اونا داها دا ياخشي همراهي ائده‌بيلرلر.
Prof. Dr. Dr. Manfred Spitzer
Norolojik Bilimler ve Oğrenme icin Transfer Merkezi, Ulm
اويونلار
یازار : آيدين(علي محمد) خلفي زنگير
چمبر شكلينده تخميناً 3 ارشين بويوندا بير جيز چكيلير، اويونچولار اؤزلرينه يولداش گؤتوروب ايكي بؤلومه بؤلونورلر. پوشك آتيلير. پوشكو اودوزان يولداشلارييلا بيرليكده جيزين ايچينده اولور.
جيزين ايچينده اويونچولارين سايي قدر گؤن قاييش سريلير. قاييشين توققاسي جيزين قيراغينا بير قاريش قالان و او بيري باشي جيزين اورتاسينا دوغرو اولور و هر اويونچو اونلاري چؤلده‌كي اويونچولاردان ساخلاماق اوچون قاييشين بيري‌نين اوستونده دورور اما تاپدامير.
اويون باشلانير. جيزين چؤلونده اولان اويونچولار قاييشي جيزين ايچيندن گؤتورمه‌يه و ايچينده اولانلار اونلارين آياقلاريني اؤز آياقلاري ايله وورماغا چاليشيرلار. ايچه‌ريده‌كي اويونچولار چؤلده‌كيلرين آياقلاريني وورماق اوچون بير آياقلاري جيزين ايچينده اولما‌ليدير. بو ايشي چؤلده اولان اويونچولارين بيريني توتوب ايچه‌ري چكمكله ده گؤره بيلرلر. آياغي باسيلان اويونچو يولداشلاري ايله بيرليكده جيزين ايچينه و ايچهريدهكيلر چؤله يئر دييشيرلر.
چؤلده‌كي اويونچولار دا آياقلاريندان موغايات اولاراق جيزين ايچينه سريلن قاييشلاري اله كئچيرمه‌يه چاليشيرلار. قاييشين بيريني اله كئچيرندن سونرا، ايچه‌ريده اولانلار اوچون ايش بير آز چتينلشير. چونكي او قاييشلا ووراراق، قاييشلارين قالانيني دا اله كئچيرمك راحت اولور. قاييشلار اله كئچديكدن سونرا جيزين ايچينده اولانلاري قاييشلارلا وورماغا باشلاييرلار. ايچهريدهكيلر اونلارين بيري‌نين آياغيني، آياغييلا وورونجا اويون بئله گئدير. بئله اولاندا جيزداكيلار قاييشلاري چؤلده‌كيلردن آليب يئرلريني دييشيرلر و قاييشلا وورماغا باشلاييرلار.
اويونون قورالينا گؤره قاييشين توققاسييلا يوخ او بيري باشييلا قورشاقدان آشاغا تكه‌جه قيچا وورما‌ليديرلار. بو اويونو گنجلر، پاييز فصلي و بايرام قاباغي اويناييرلار. بو اويونو اويناماغا جسارت گؤسترن اويونچو اؤزونه فخر ائده‌بيليردي، چونكي اوركلي و قورخماز اولدوغونو هامييا گؤستَريردي. دوغرودان دا بئله ايدي. چونكو گون قاييشين آغريسينا هر آدام دؤزه بيلمز.
اويونلار
یازار : آيدين(علي محمد) خلفي زنگير
قيشدا، قار ياغان چاغلار، يئني‌يئتمه و گنجلر بير يئره توپلاشيب و هر كيمسه اؤزونه يولداش سئچيب و قارتوپو اويناييرلار. قاردان اوووجلارينا توپلاييب و اونو توپ شكلينده سيخيب بركيديب او بيري بؤلومون شخصلريني وورماغا آتيرلار. بو اويون چوخ دقّت و حاضر اولماق ايسته‌ديگينه گؤره اونو چوخلو گنجلر اويناييرلار. دؤنه‌لرله گؤرونوردو كي، قارتوپو او بيري طرفين بيري‌نين باشينا و اوزونه ديير. بو اويون اوشاقلار اوچون تهلوكه‌ليدير.
چمبر (دايره) شكلينده بير جيز چكيلير، اويونچولار اؤزلرينه يولداش گؤتوروب ايكي دسته‌يه بؤلونورلر. پوشك آتيلير، يعني هر دسته‌نين باشچيلاري آيريلير ايكي‌سي بير بللي مسافه آرا توتا‌راق، بير بيرينه دوغرو نوبتله، بيري‌سي «آتديم» دئييب آدديم آتيرلار. سوندا بيري‌نين آياغي اوستده قالير و دئيير باسديم. بئله‌ليكله آياغي باسيلان باشچي پوشكو اودوزا‌راق يولداشلارييلا بيرليكده جيزين ايچينده قالما‌لي اولور.
اويون باشلانير. جيزين ايچينده اولان اويونچولار چاليشيرلار آياقلارييلا چؤلده اولان اويونچولارين آياقلاريني باسداسينلار. بو ايشي ائده بيلسه‌لر، يئرلر دييشيلير، اما بو ايشي گؤرنده گرك بير آياقلاري جيزين ايچينده اولا. بو ايشي چؤلده اولان اويونچولارين بيريني توتوب ايچه‌ري چكمكله ده گؤره بيلرلر.
چؤلده اولان اويونچولار جيزين باشينا فيرلانا‌راق ايچه‌ريده‌كي اويونچولاري گيجلديب شيلله ايله وورورلار. بعضاً گؤرورسن كي، ايچه‌ريده‌كيلرين بيريني توتوب چؤله سورويورلر، وور كي- ووراسان، دؤيورلر. ايچه‌ريده اولانلاردا ال-اله وئريب چؤله سوروننين يارديمينا گليب اونو ايچه‌ري چكيرلر. قريبه حال اولور اويونچولار پيشدي‌بيلدي دئيه‌رك هاي ساليرلار و آياقلاري‌نين وورولماسيندان هادير اولاراق ايچه‌ريده اولان اويونچولاري وورورلار تاماشا‌چيلار دا ذوق آلا‌راق هاي تؤكورلر. بئله حاللاردا آرادا جيزين ايچينده اولانلار اونلاري وورماق ايسته‌ين چؤلده‌كيلرين بيريني ايچه‌ري چكيب آياغيني باسيرلار.
چؤلده‌كي اويونچولارين آياقلاري باسيلانا قدر اويون بئله‌سينه دوام ائدير. سونرا چؤلده‌كيلر ايچه‌ري و ايچهريدهكيلر چؤله ديشيلير و اويون دوام ائدير. بو اويونو گنجلر و يئني‌يئتمه‌لر پاييز و بايرام آييندا چوخ اوينارلار.
اينانج
یازار : آيدين(علي محمد) خلفي زنگير
موغاني آراييب-آختاراندا داغلاريندا دوزلرينده اوجاق آدي ايله، تك آغاجا چوخ توش گليريك. بعضاً اونلارين يانيندا تيكيلميش تيكينتي ده اولور. بو اوجاقلارين هر بيري بير درده شفا وئرن تانينير. خلق نذر-نياز ائدير و ايستَگي‌نين يئرينه يئتمه‌سيندن اؤتورو، اوجاق آدينا آپاريب اوردا يئمك-ايچمك پايلايير. و او آغاجلارا كسيلميش پارچا (چاپيت، پارچا ديليگي) باغلايير.[1]
«بلليديركي، دنيانين بير چوخ اسكي خلقلرينده و او سيرادان، تورك ديللي خلقلرده آغاجا تاپينميشلار . علم عالمينده تاپينيلان آغاجلارا «دونيا آغاجي»، ابديّت آغاجي دئييرلر. آغاجا تاپينما طبيعته اينام و اونون آيريلماز حصّه‌سي آغاجا اينام ايلكيندير. چونكي آغاج ائله‌جه‌ده ياشيل‌ليق (وحشي دنلي بيتكيلر و س.) انسان اوچون اوزون زمانلار اساس قيدا منبعي اولموشدور. اسكي انسان ايلكين معيشتي ايله سيخ باغلي اولان، احاطه‌سينده‌كي طبيعتي و اونداكي بو ويا باشقا شئيلري آنيميستلشديرميش (جانلي سانميش- ع.خ.)، اونلارا تاپينميشدير. آغاجي ايره‌لي‌ده قيد ائديلديگي كيمي ان ايلكين ايناملاردان بيريدير و بو اينام معيشتده‌كي، حيات طرزينده‌كي عيني‌ليكله، بنزه‌ييشله باغلي اولاراق تفكّرده اوخشارليق ياراتميشدير. بودا اؤز نوبتينده ميفولوژي تفكّرده، آغاجا اينامدا تيپولوژي (اينسان تيپلريني بليرله‌مه و آييرد ائتمه اوصولو- ع.خ.) حادثه كيمي ديقّتي جلب ائدير. آغاج-ياشيل‌ليق اسكي انسانين ياشاييشي اوچون ايلكين «ارزاق» منبعي اولدوغوندان اونو داها الهي‌لشديرميشدير. ائله بونا گؤره ده اسكي تورك ديللي انسان آغاجا داغ كيمي، اولو اجداد- اولو آنا كيمي باخميشدير.»[2]
اويونلار
یازار : آيدين(علي محمد) خلفي زنگير
بو اويوندا ساققا آدلانان آشيق يا بير تيكه داش استفاده اولونور. اويونچولارين بيري ساققاسيني باشا چيخير، او بيري اويونچولار سيرا ايله چيخيلميش ساققاني وورماغا ساققا آتيرلار. ساققاني ووران اودور. بو اويوندا هر دؤنه اودان اويونچو اوبيري اويونچولاردان بير هنه آلير. چيخيلان ساققاني وورابيلن اولماسا اويونچولارين هربيري اونا بير هنه وئرير. هنه معمولاً آشيق، پيلك، صدف، جينقير و س. اولور. بو اويونو اوشاقلار چوخ اويناييرلار.
اوشاقلار بير يئره توپلانا‌راق شكين بيرينده اولدوغونو بلله‌ييرلر. پيشدي دئييلديگينده شكلي شخص قاچير و باشقا اويونچولار اونا اللريني ووروب شكي آلماق اوچون اونو قووورلار. كيم اونا اَليني وورسا شك اوندا اولور و قالان شخصلر اونو سيخيرلار. اويون بئله‌جه دوام ائدير. بو اويونو اوشاقلار ايلين سويوق آيلاريندا اويناييرلار و قاچماقلا اؤزلريني قيزيشديريرلار.
اويونلار
یازار : آيدين(علي محمد) خلفي زنگير
بو اويون آغاجلا اوينانان اويونلارداندير. 4 نفر يا چوخ تعداد شخص ايكي بولومه بولونورلر. تقريباً بير متر يا هشتاد سانتي متر اندازه‌سينده «توخماغ» آدلانان آغاج، بير قاريج اندازه‌سينده «چيلينگ» آدلانان آغاج و سايي هر گروهون تعدادي ايله برابر اولان ال‌آغاجي لازيمي وسايل‌لردير. اويون بير هامار يئرده اوينانير. اوردا دابانلا «هبه» آديندا بير بالاجا چالا دوزه‌لير. اويونچولار هانسي گروهون اويونو باشلاماسي اوچون پوشك آتيرلار. بو اويون اوچ مرحله ده اوينانير ؛ «توخماغ» ،«قره‌ياني» و «آغ‌ياني».
«توخماغ» مرحله‌سينده اويونچو توخماغي اوجو باش بارماغين يانيندا و قالاني الين آشاغاسيندان يئره ساللاناراق گؤتورور، بير آياغي هبه‌ده اولاراق چيلينگي گؤيه آتيب و او شكلده دوزونه وورور . مقابل گروهون نفرلري ده اللرينده اولان آغاجلا چيلينگي گويده وورماغا چاليشيرلار. وورا بيلمه‌سه‌لر، هبه باشيندا دوران اويونچو توخماغي هبه‌نين اوستونه قويور و باشدا اولان اويونچولاردان بير نفر چيلينگي توخماغا ساري آتير اگر چيلينگ توخماغا دَيْسه او نفر سيرادان چيخيب باشقاسي گلير و اگر دَيْمه‌سه اويونا دوام ائدير. چيلينگي هبه اوستونده اولان توخماغا ساري آتاندا اگر توخماغ دوز چئلينگي آتانا ساري اولماسا ، چئلينگ آتان نفر چيلينگي قولاغينا قويوب و دئيير؛ « اَيري قولاغ دوز قولاغ » و هبه‌يه طرف يورويوب ياخينلاشير و هبه اوستونده اولان گرك توخماغي دوزلده، عكس حالدا چيلينگ هبه‌يه چاتيب توخماغي وورور. توخماغ ووراندا اگر چيلينگي آتيب وورا بيلمه‌سه دئييرلر «بي پيت» و اگر متوالي اوچ دفعه اولسا اويون اوينايان سيرادان چيخير. اوچ دؤنه ويرسا و يانماسا «قره‌ياني»يا چيخير.
«قره‌ياني» مرحله‌سينده توخماغين اوجو جولو بارماغا ساري و اوزونو باش بارماغا ساري قالاراق، آغاجي ياندان توولاياراق بئش دفعه چيلينگي آتيب وورور، مقابل گروهون نفرلري اگر چيلينگي گؤيده آغاجلا وورسالار او نفر يانيب و سيرادان چيخير اما وورا بيلمه‌سه‌لر چيلينگ هارا دوشوب اوردان بير نفر اونو هبه‌يه طرف آتير ، اگر چيلينگ هبه‌يه بير توخماغ اندازه‌سينده ياخينلاشسا اويونچو اويوندان چيخير عكس حالدا اويونا دوام ائدير، يا اگر چيلينگ آتيلان زمان دوز هبه‌نين ايچينه دوشسه «هبه چوش» اولدو دئييرلر و هبه‌ده اولان بوتون اويونچولار يانير و سيرا دييشيلير. اويون سيراسيندا اگر چيلينگي آتيب وورا بيلمه‌سه دئييرلر بير «اياغ اوستي» و باشدا اولان اويونچولاردان بيري چيلينگي دوشدويو يئردن گؤتوروب، اياغي اوستونه قويوب و هبه‌يه طرف آتير اگر چيلينگ هبه‌ني كئچسه گروه نفرلري هاميسي يانيب و اويون ديشيلير او سيرا دا قره‌ياني اوينايان گرك چيلينگين هبه‌دن سوووشماغينا مانع اولا. قره‌ياني ووران اولجه چيلينگي ووراندا دئيير؛ قره‌ياني‌نين بي قولاغي و ايكينجي‌سينده دئيير؛ قره ياني‌نين ايكي قولاغي و اوچونجوسونده دئيير قره ياني‌نين اوچو و دوردونجوسونده دئيير؛ دؤردي-مؤردي چوبان الله‌وئردي ياغلادي ايچينه وئردي «بوردا منظور كره ياغين چؤرك اوستونه ياخيب يئمكدير» و بئشينجي‌سين ووراندا دئيير؛ قره‌ياني‌نين بئشي. اگر بئش دفعه چيلينگي ووروب و يانماسا آغ‌ياني مرحله‌سينه كئچير و اوچ دفعه چيلينگي آتيب يان طرفدن وورور اگر اوچ دفعه ده يانماسا داي او نفر آغ‌ياني‌يا چيخير (همه‌شه ياني اولور) و اويوندان چيخان يولداشلارين دا اويونا قايتارا بيلير. ائل آراسيندا بيري‌نين هئچ كيمسه‌دن احتياجي اولماسا دئييرلر داي دئيه‌سن آغ‌ياني‌يا چيخدين». آغ‌ياني اويناياندا اگر ووران نفر چيلينگي آتيب وورا بيلمه‌سه و بوشا كئچيرسه، دييرلر؛ بير «قيچ آلتي» و مقابل گروهدان بير نفر چيلينگي دوشدويو يئردن گؤتوروب قيچي‌نين آلتيندان هبه‌يه طرف آتير اگر چيلينگ هبه‌ني كئچسه تمام گروهون نفرلري اويوندان خارج اولوب و يئرلري دييشيلير. آغ‌ياني‌يا چيخان نفر اويوندان چيخميش يولداشلاريندان بيريني اويونا گتيرمك ايسته‌سه، گرك اوچ دفعه چيلينگي ياندان آتيب و وورا، اول كي چيلينگي ووراندا دئيير، «يولداشيمين بي قولاغي»، اگر يانماسا ايكينجي‌سينده دئيير؛ «يولداشيمين ايكي قولاغي» و اگر يانماسا اوچونجوسونده دئيير «دَنديري دانا ديري، من اؤلسم يولداش ديري» و اگر اونون چيلينگين گؤيده وورسالار دا يولداشي اويونا دوام ائده بيلير.
بو اويوندا هبه‌ده اولماق اوستونلوك ساييلير. باشدا اولانلار چيلينگين دالييجا قاچماقلا يورولورلار. اونا گؤره چيلينگي اوزاغا ووران اويونچو «لوققو-لوققو ...» دئمكله طرفي اينجيدير. همه‌شه ياني‌يا چيخان اويونچو بعضاً باشدا اولانلارا لطف ائتمك ايسته ينده، چيلينگي يانلارا وورماق يئرينه ووروب هاوايا قالديرير و دئيير «پاكي‌دو پاكييييييي».