بلاقا گؤره
-
وئبلاغا گؤره آچيقلاما:
بو وئبلاق موغان بؤلگهسينده اولان كند و شهرلرله ايلگيلي فولكلور، ميتولوژي و مدنيت حاقدا آراشديرما آپارير. بو قوللوقدا باشاري قازانماق بيليملي و ماراقلي اينسانلارين يارديمي اولمادان چوخ چتيندير. اونا گؤره يارديم ديلهمكدن ده گئري قالميريق.
يازيلان فولكلور نمونهلري، اينانج‌لار، ميتولوژيك دوشونجه آچيقلامالاري و.س. ايله اوغراشماق هئچده بوتون بونلارا اينانماق معناسينا گليب چيخمير. دئييلنلرده اجداديميزين دوشونجه و ياشام طرزينين ساخلانديغي و اوزون مدت سورن نئچه نسيلين تصور و دوشونجهلريندن سوزولوب گلن بو ماترياللار، اينانماغا دئييل مطالعه ائديب اؤيرنمك و درس آلماق اوچون اؤنمليدير.
بوتون بونلاري يئر آلتيندا اولان آرخولوژي اشيالاري كيمي مطالعه ائديب بير ميلتين كولتور، مدنيت، ياشام طرزي و معنوياتيني اؤيرنمك اولار. آرخولوژي اشيالاريني اوغرولار چالديغي كيمي، بو ماترياللاري داشييان ياشليلاريميزي دا اجل ووردوقجا، گونو-گوندن بو حاقدا مطالعه اوچون گئرچك قايناق آزالير. اون اوچون كيمليييميزين قايغيسينا قالان هر كيمسه گئج اولمادان ايشه باشلاماليدير.