اينانج
یازار : آيدين(علي محمد) خلفي زنگير
موغاني آراييب-آختاراندا داغلاريندا دوزلرينده اوجاق آدي ايله، تك آغاجا چوخ توش گليريك. بعضاً اونلارين يانيندا تيكيلميش تيكينتي ده اولور. بو اوجاقلارين هر بيري بير درده شفا وئرن تانينير. خلق نذر-نياز ائدير و ايستَگي‌نين يئرينه يئتمه‌سيندن اؤتورو، اوجاق آدينا آپاريب اوردا يئمك-ايچمك پايلايير. و او آغاجلارا كسيلميش پارچا (چاپيت، پارچا ديليگي) باغلايير.[1]
«بلليديركي، دنيانين بير چوخ اسكي خلقلرينده و او سيرا‌دان، تورك ديللي خلقلرده آغاجا تاپينميشلار . علم عالمينده تاپينيلان آغاجلارا «دونيا آغاجي»، ابديّت آغاجي دئييرلر. آغاجا تاپينما طبيعته اينام و اونون آيريلماز حصّه‌سي آغاجا اينام ايلكيندير. چونكي آغاج ائله‌جه‌ده ياشيل‌ليق (وحشي دنلي بيتكيلر و س.) انسان اوچون اوزون زمانلار اساس قيدا منبعي اولموشدور. اسكي انسان ايلكين معيشتي ايله سيخ باغلي اولان، احاطه‌سينده‌كي طبيعتي و اونداكي بو ويا باشقا شئيلري آنيميستلشديرميش (جانلي سانميش- ع.خ.)، اونلارا تاپينميشدير. آغاجي ايره‌لي‌ده قيد ائديلديگي كيمي ان ايلكين ايناملاردان بيريدير و بو اينام معيشتده‌كي، حيات طرزينده‌كي عيني‌ليكله، بنزه‌ييشله باغلي اولا‌راق تفكّرده اوخشارليق ياراتميشدير. بودا اؤز نوبتينده ميفولوژي تفكّرده، آغاجا اينامدا تيپولوژي (اينسان تيپلريني بليرله‌مه و آييرد ائتمه اوصولو- ع.خ.) حادثه كيمي ديقّتي جلب ائدير. آغاج-ياشيل‌ليق اسكي انسانين ياشاييشي اوچون ايلكين «ارزاق» منبعي اولدوغوندان اونو داها الهي‌لشديرميشدير. ائله بونا گؤره ده اسكي تورك ديللي انسان آغاجا داغ كيمي، اولو اجداد- اولو آنا كيمي باخميشدير.»[2]
بير چوخ دب، عادت و عنعنه‌لريميزين، كؤكو تاريخين درين قاتلاريندا اولدوغو معلومدور. تاريخ بويو مختلف دينلر گليب بير-بيريني دييشسه ده، اسكي دينلردن قالان عادت-عنعنه‌لر اولدوغو كيمي، يا دييشيك صورتده خلقين اينانجيندا اؤزونو ياشاديب ساخلاميشدير. بونلاردان بيري‌سي آغاجا اينام و اونا تاپينما‌دير. اسلام ديني آذربايجانا گلديكدن سونرا بو كيمي تاپينما‌لارين ييغيشيلماسي دوغرودور، اما اونا گؤره يارانميش دبلرين چوخونو ايندي ده آذربايجانين بعضي يئرلرينده گؤره بيليريك؛
داش زئيوه‌ده ايكي قوروموش آرديج (سرو) آغاجي وار ايميش. بيري «دده ماسيد»ين مزاري‌نين يانيندا، بيري ده ساري كوله‌ده‌ايميش. اورانين انسانلاري بو آغاجلاري مقدّس بيليب و اونلاري زيارت ائديرميشلر. آرديجين قوتسالليق و قورويوجولوغونا اينانج باشقا ائل‌لريميزده ده واردير. «آلتايليلاردا يئني اؤلموش شخصين ائويني پيس روحلاردان آريتماق (تميزله‌مك) اوچون اونون قيرخيندا شامان گليب او ائوده آرديج توسدوسو دوزلديردي.»[3]
اونگوتون يئل‌سويو كندينده بير اوجاق وار. «مرحوم شابان محمدي» بو اوجاغا گؤره دئييردي؛ «منيم آتام دئييردي اورا اسكيدن اوجاق اولوب. سونرا‌لار دوز دانيشان و ياخشي بير شخص «شاه‌علي‌مردان» آديندا اؤلدوكده او اوجاغدا باسديرديلار. اوندان سونرا اوجاغا گلنلر او مزاري اؤپوردولر. بو اوجاغدا اوچ آرديج[4] آغاجيني باشلاريندان بير-بيرينه باغلايا‌راق چاتما شكلينده يئره قويوب اوستونه قنديل باغلاميشديلار.»[5] بو سؤزدن ده بئله گؤرونور كي، آرديج آغاجي مقدّس ساييلديغي اوچون اوجاغدا اولماسي لازم ايميش.
اونگوتدن قاراداغا ساري، «سرو آغاجي» آديندا بير كند وار. «سرو» سؤزو «آرديج»ين فارسجا دئييميدير. منجه بونون كؤكونو آراشديرساق اورا آرديج آغاجي و اوجاقلا درين ايلگيده اولا بيلر. بونلار بوتونلوكده، بورا‌لاردا ياشايان اسكي تورك انساني‌نين، ديني و ميفيك دوشونجه‌سينده آغاجين اؤنملي اولدوغونو گؤستَرير.
آذربايجانين آدليم شاعيري «حكيم ابوالقاسم نباتي»نين دوغوم و ياشام يئري اولان «اوشتوبون» كندي‌نين اؤنونده نباتي‌نين مزاري يئرله‌شن اوجا بير تپه وار. او تپه‌نين اوستونده اون‌اوچ دنه آرديج آغاجي وار. كندليلرين دئديگينه گؤره او آغاجلار اولان يئره پير دئييلير. او آغاجلارا گؤره اورا دا مقدّس ساييلير. دئييرديلر؛ بيز گؤزوموزو آچاني بو آغاجلاري بئله گؤرموشوك. بو آغاجلارا ضرر يئتيرمك گوناهدير. كيمسه ضرر يئتيرسه آلتيني چكر. بلكه ده بورانين قوتسالليغينا گؤره حكيم نباتي دنياسيني دييشمزدن بير نئچه آن اؤنجه بير اوشاغا دئيير؛ گئد كندليلره دئ كي، نباتي اؤلوب گليب مني آپاريب او پيرده باسديرسينلار.
بيزلرده بئله بير اينانج وار؛ اؤلونو كفن ائديب باسديراندا، بارماق يوغونلوقدا و 30 سانتيمتر اوزونلوغوندا اولان ايكي سؤيود (قيزيل سؤيود) آغاجيني پامبيقلا بوكوب اؤلونون قولتوغونون آلتينا قويورلار و باسديريرلار. اينانيرلار؛ «بو آغاجلار قورومايينجا اؤلووه سورغو-سؤال اولمور»[6]، «او دنيادا او شخص اونا سؤيكه‌نيب اوتورور»[7]. بئله معلوم اولور كي، آغاجا اينام او قدر گوجلو اولوب و اونونلا ياشايان توركون اتينه-قانينا يئريميش كي، ايندي ده باشقا دين و اينانجلار ايچينده اؤزونو ياشادا بيلير. دئمه‌لي «ايسلاميّت گيره‌نه كيمي اوغوز اؤلكه‌لرينده ده شامانيزم يايقين ايدي. بونونلا ياناشي سونراكي يوز ايل‌لرده بئله، اسلاميّتين گوجلو كولتورو قارشي‌سيندا شامانليغين ايزلري سيلينمه‌ميش، ديني گله‌نكلر آراسيندا گيزله‌نيب قالميشدير.»[8]
«آغاجا – دنيا آغاجينا اينام بوتون تورك ديللي خلقلرده وارميش و بو اينامين يا اؤزو ، يادا ايزلري بو و يا باشقا شكلده سون وقتلره قدر ياشاميشدير.»[9] ادّعاميزا گؤره بؤلگه‌ميزده يايقين اولان بير نئچه نمونه وئريريك:
-سؤيود آغاجي هر قاپيدا اولسا بوتون بلاني او قاپيدان اوزاقلادار.[10]
-داغداغانا آغاجي‌نين قورويوجو خاصيّتي وار اونو اؤزلليكله داوارين بوينوندان آسارلار كي، گؤز دَيمه‌دن قورويار.[11]
-بار وئرمه‌ين آغاجي كؤهنه ايل-بايرامي‌نين آخشامي قورخودورلار او بار وئرير. بيري بالتا گؤتورور و دئيير؛ «كسيم؟» بيري ده دئيير؛ «يوخ كسمه بار وئرر».[12] آغاجي جانلي و دوشونجه‌لي سانمايان نئجه بئله بير ايش گؤرر؟ دئمك اولار كي، آغاج آذربايجان و موغان انساني يانيندا جانسيز و دوشونجه‌سيز معمولي بير بيتگي دئييل. او دوشونن، ائشيدن و عقل‌لي بير جانليدير. بلكه ده اونون گوجو، دوشونجه‌سي و بيلگي‌سي آرتيق اولدوغو اوچون، انسانين دا درديني ائشيديب-بيليب و حل ائدير.
-قيزيل سؤيود آديندا بير آغاج چرشنبه گئجه‌سي باشيني اَييب يئره قويور. كيم بو آني گؤررسه نه ايستگي اولسا يئرينه يئتر.[13]
-هانسي سا عايله عضوونون اؤلوموندن ياسا باتميش عايله‌نين حياطيندا اولان ميوه آغاجي، ياسدان دولايي قوروماسين يا ميوه سي كسيلمه سين دئيه، بايرام قاباغي خينا ياخماقلا «ياسدان چيخار»يرلار.[14]
«اسكي تورك ديللي خلقلرده قايين‌آغاجي (دونيا آغاجي) گؤيدن اوشاقلارين حامي‌سي اومايلا بيرگه يئره ائنميشدير. ائتيل–وولقا بويوندا ياشاميش قيپچاقلار (بو قبيله بيرلشمه‌سي سلسله‌سي قازاق، آذربايجان و بعضي خلقلرين سوي كؤكونده اشتراك ائتميشدير) آغاجي اسكيدن اؤزلري‌نين ياراديجي‌سي سايميشلار. اونونجو عصر عرب سيّاح عالِمي ابن فدلان آغاج پارچاسيني بويونلاريندان آسميش باشقيردلاردان، قيپچاقلاردان بونون سببيني سوروشدوقدا بئله جواب آلير: من آغاجدان دوغولموشام. من آغاجدان باشقا اؤزگه يارا‌دان ياراديجي تانيميرام. سون وقتلره قدر آذربايجانين بعضي يئرلرينده اوشاقلاري، حتّي حيوانلاري شر روحدان قوروماق اوچون بويونلاريندان داغداغان آغاجي‌نين پارچاسيني آسارديلار... آذربايجانليلار دنيا آغاجيني بوتون انسانلارين آناسي، حامي‌سي كيمي تصوّر ائديرميشلر. ناخجيواندا ياييلميش ميفيك بير دئييمده دئييلير كي، دنيادا بير آغاج وار. اونون يارپاغي‌نين هر بيري بو دنيا‌داكي آداملاردير. اونون يارپاغي ساراليب يئره دوشركن آدام اؤلور . بو آغاج شُبهه‌سيز كي، دنيا آغاجيدير. دنيا آغاجي گؤيه دگنه قدر اوجا اولدوغوندان باش تانري اولگئن اونون باشيندا ياشاييرميش و قام-شامان بؤيوك آيينلرده گؤيه قالخماق اوچون بو آغاجدان استفاده ائدرميش.»[15]
«اسكي تورك ديللي خلقلرين بلكه ده هامي‌سي دنيا آغاجينا، داغا، سويا (بولاغا) تاپينميش و اونلاري تاپينمادا بيرگه خاطيرلاميشلار. نه اوچون بو اوچ توس- باشلانغيج بيرگه ياد ائديليرميش؟ بيزجه بونون سببي اودوركي هر اوچو ده همين خلقلرده آرو- توس- مقدّس باشلانغيج، ايلك باشلانغيجدير. همين اوچ باشلانغيجا باشلانغيج اينامي كيمي باخميش و ائله بونا گؤره ده داغا، دنيا آغاجينا، سويا (باشقا- باشقا شكيل‌لرده- بولاق، چاي، گؤل، دنيز) بيرگه تاپينميشلار. قيد ائتديگيميز كيمي دنيا آغاجي تورك ديللي خلقلرده او قدر گئنيش ياييلميش كي، حتّي اونون شرفينه خصوصي مراسم، بايرام كئچيرميشلر. همين مراسم، بايراملا باغلي اون يئددينجي–اون سككيزينجي عصرده قيده آلينميش يازي‌نين بير يئرينه دقّت يئتيرك. اوردا يازيلير كي، اوزن قالا و اونون اطرافيندا ياشايان آذربايجانليلار آغاجا تاپينيرميشلار. اونلار ارس_آراز چآيي‌نين ساحيلينده تاپينديقلاري آغاجين اطرافيندا قوربانلار كسيب بايرام ائديرميشلر.»[16]
«تورك ميتولوژي‌سينه گؤره اوغور و بوللوق تانري‌سي اؤلگئنين يئددي اوغولوندان بيري، روح قورويوجوسو «ياشيل خان» آدلي ايدي. بيتگيلرين گؤيه‌ريب آرتماسي اونون اوزرينه ايدي. اوندان باشقا اؤلگئن اينانجلارينداكي افسانه‌‌لره گؤره بيتگيلرله ايلگيلي بئله دئييلير: اؤلگئن انساني ياراتديقدان سونرا قارغا آديندا قوشو اولو تانري‌نين قوللوغونا گؤندرير. و اؤز ياراتديغي وارليغا، دئمك انسانا روح ايسته‌يير. قارغا گؤيه اوجالير روحو آليب قاييداندا يئر اوزونده لش گؤرور، اؤزونو ساخلايا بيلمه‌ييب لشدن گؤتورمكدن اؤتورو ديمديكيني آچير. ديمديكيني آچان كيمي روح آغزيندان شام (كاج) مئشه‌سينه دوشوب ايتير. بوندان بئله تصوّر اولونور شام آغاجي دا آرديج آغاجي كيمي قيشدا و يازدا ياشيل‌ليغيني ساخلايير.»[17]
«قيرقيزيستانين مختلف سكونت واحدلرينده هر ايل اجرا ائديلن بو تؤرن گونونده، خلقين كئچه‌جگي يول اوزرينده اويغون بير يئرده اود يانديريلير. تؤرَنه گلنلر اوددان آتلانا‌راق تؤرن يئرينه گلير. اوددان كئچديكدن سونرا آرديج آغاجي‌نين خوللاريندان سيمگه‌سل بير كؤرپو قورولور. بو كؤرپونون آلتيندان كئچنلرين اوزرينه آرديج آغاجي‌نين خوللاري سويا باتيريلا‌راق سو سپيلير.»[18]
«آلتايليلارلا ياقوتلارين بير اينانيشينا گؤره؛ قاراخانين اوغلو بؤيوك تانري اؤلگئن، انسان ووجودلاري ياراتدي، بونلارين جاني يوخ ايدي. جان وئرمك اوچون قاراخانا بير قوزغون گؤندردي. قارا خان اؤلگئن»ين ياراتديغي انسان اوچون ايسته‌نيلن جاني وئردي. قوزغون دا جاني ديميديكلري آراسينا سيخيشديرا‌راق گئري دؤندو. يول اوزون ايدي، قوزغون آجيخدي. اوچاركن يئر اوزونده بير دوه لشي گؤردو. يشتهاسي اونو لشه دوغرو چكيردي. آنجاق قوزغون لشدن اوزاقلاشدي، يولونو سوردو. بير آز گئتديكدن سونرا گؤزونه يئرده بير آت لشي گؤروندو. اشتهاسي قاباران قوزغون اؤزونو توتوب لشين يانيندان كئچدي.
سون گوجونو وئره‌رك اوچان قوزغون بو دؤنه بير اينك لشي گؤردو. بو لش قوزغونو داها چوخ اؤزونه چكدي. قوزغون: (آه نه گؤزل) دئدي. بونو دئيركن ديمديكلريني آچينجا جان بير شام (چام-كاج) مئشه‌سي‌نين اوزرينه دوشه‌رك آغاجلارا داغيلدي. بونون اوچون دور كي، شام آغاجلاري قيشدا، يازدا يارپاقلاريني تؤكمه‌ييب، جانلي اولورلار.»[19]
دئييلنلردن بئله نتيجه آليريق كي، بيزده اولان نمونه‌لرله، باشقا يئرلردن گلن نمونه‌لرين، اوست-اوسته دوشمه‌سي، آغجا اينامين درين تاريخه مالك اولوب و گئنيش صورتده ياييلماسيندان، و اونا اينانان خلقلرين بير كؤكدن اولماسي يا درين ارتباط و ايلگي‌سيندن خبر وئرير.
[1] - رحماني سالامت، گرمي‌نين پرمئيير كندي ساكني، 67 ياشيندا، ساوادسيز، 1391.
[2] - قيزيل دؤيوشچونون طالعي، ميرعلي‌سيدوف، صفحه13، pdf
[3] - Uraz Murat. Türk mitolojisi. Düşünen adam yayınları. İkinci basqı, Şubat 1994. 340 s, s:228.
[4] - آرديج: موغانين چوخ يئرلرينده بو آدلا تانينان آغاج، دكتر حسين محمدزاده صديق، فارسجايا كؤچوردويو، محمود كاشغري‌نين «ديوانِ لغات الترك» كتابي‌نين 122-جي صفحه‌سينده، آرتوچ يازيلير. بو آغاجا فارسجا «سرو» دئيلير. داغلاردا بيتير و بويو 20 ارشينه كيمي اوجالير، چوخ دؤزوملو و داياناتلي اولور، يئني ياشيل يارپاقلاري دايمي اؤلو يارپاقلاري دييشير و اونا گؤره بوتون ايلي ياشيل قالير.
[5] - محمدي شابان، اونگودون يئل‌سويو كندي ساكني، 75 ياشيندا، ساوادلي، 1387. (مرحوم)
[6] - سبزي جوزي، گرمي‌نين زنگير كندي ساكني، 75 ياشيندا، ساوادسيز، 1386. (مرحوم)
[7] - رحماني سالامت، گرمي‌نين پرمئيير كندي ساكني، 67 ياشيندا، ساوادسيز، 1391.
[8] - Uraz Murat. Türk mitolojisi. Düşünen adam yayınları. İkinci basqı, Şubat 1994. 340 s, s: 201.
[9] - قيزيل دؤيوشچونون طالعي، ميرعلي‌سيدوف، صفحه 14، pdf.
[10] - رحماني سالامت، گرمي‌نين پرمئيير كندي ساكني، 67 ياشيندا، ساوادسيز، 1391.
[11] - عليمحمدي مارفت، گرمي‌نين پرمئيير كندي ساكني، 80 ياشيندا، ساوادسيز، 1391.
[12] - عليمحمدي مارفت، گرمي‌نين پرمئيير كندي ساكني، 80 ياشيندا، ساوادسيز، 1391.
[13] - عليمحمدي مارفت، گرمي‌نين پرمئيير كندي ساكني، 80 ياشيندا، ساوادسيز، 1391.
[14] - ماجيدي خانيم، گرمي‌نين چونه‌خاني كنديندن، اردبيل شهري ساكني،70 ياشيندا، ساوادسيز، 1388.
[15] - قيزيل دؤيوشچونون طالعي، ميرعلي‌سيدوف، صفحه 16، pdf.
[16] - قيزيل دؤيوشچونون طالعي، ميرعلي‌سيدوف، صفحه 28، pdf.
[17] - رنگ و نوروز در اساتير تورك، دكتر رشاد گنج، كؤچورمن: امين روشن، صفحه 40-41.
[18] - Durmuş Arık, Kırgızlarda kurban fenomeni, pdf. s. 169. AüifOXLVI (2005), sayı I, s. 157.174, s: 169.
[19] - Uraz Murat. Türk mitolojisi. Düşünen adam yayınları. İkinci basqı, Şubat 1994. 340 sefhe, s: 125.